A Policía Local de Lugo detivo un veciño de Guitiriz por un delito de desobediencia e resistencia grave a axentes da autoridade. O home protagonizou un altercado nun supermercado da capital luguesa tras ser localizado por unha patrulla policial mentres tomaba o sol nun banco da rúa.
Segundo relataron fontes da Policía Local, na tarde do pasado sábado 4 de abril, uns axentes viron o arrestado e mais a outra persoa deitados ao sol na rúa Montero Ríos. Ao non teren xustificación para estar na vía pública durante o estado de alarma, a parella foi informada de que ían ser propostos para sanción por infracción grave.
Malia que os axentes lles ordenaron dirixirse aos seus domicilios, o asunto non quedou aí. E é que, pasados uns minutos, persoal dun supermercado próximo chamou á Comisaría de Lugo para denunciar que unha parella se atopaba no interior do local manipulando alimentos sen medidas de hixiene, sen gardar a distancia de seguridade e sen facer caso ás indicacións dos traballadores do establecemento.
Os axentes, unha vez alí, comprobaron que se trataba da mesma parella denunciada con anterioridade. O home negouse a saír do establecemento e proferiu “insultos contra o Goberno da nación e contra os policías“, motivo polo que foi detido e trasladado a dependencias policiais, para instruír as dilixencias para o xulgado de garda.
