O secretario en Galicia da Unión Federal de Policía (UFP), Miguel González, queixouse este martes de que “escasean” os xeles hidroalcohólicos na comisaría de Lugo.
Con todo, a pesar da falta de xeles, González asegura que, “de momento”, si que existe unha subministración suficiente de máscaras e luvas ante a situación de alarma sanitaria polo coronavirus.
OS LUCENSES RESPECTAN A CORENTENA
Non esconde que entre os axentes existe “preocupación“, aínda que resalta que “na rúa non hai ningún tipo de problema” á hora de que a cidadanía respecte en Lugo a corentena decretada polo goberno. Iso si, lamenta que, “se cadra, ao principio non se andou” con todo o coidado que se debía “porque non se pensou que esta pandemia ía chegar aos límites que está a chegar”.
Respecto das patrullas que saen estes días á rúa na cidade, detallou que hai entre dúas e catro. Asegura que o persoal de 170 axentes “está dispoñible sempre”. “Agora todo o mundo arrima o ombreiro”, destacou. En calquera caso, a Unión Federal de Policía segue reclamando que “serían precisos en Lugo, entre 30 e 40 axentes máis” en relación co persoal actual.
