O Concello de Lugo expresou este luns o seu rexeitamento á violencia machista e trasladou o seu pésame á familia da veciña asasinada presuntamente a mans da súa parella.
Nunha declaración institucional, subscrita por todos os grupos municipais (PSOE, PP, BNG e Ciudadanos), o Consistorio decretou tres días “de loito oficial” e expresou o “pésame da corporación e de todo o pobo de Lugo polo asasinato da veciña Clara María Expósito”. “Sen máis, conclúese este pleno extraordinario que nunca se debería de producir”, pechou así a súa intervención.
Lara Méndez incidiu en que “a violencia contra as mulleres e nenas é unha violación dos dereitos humanos e así o recoñecen as Nacións Unidas en 1993 e o Consello de Europea en 2011”. “Con todo, ano tras ano, mes tras mes e semana tras semana, este terrorismo desapiadado contra as mulleres continúa a cobrar vítimas. No que vai de ano 2020 sumamos dez, unha cada catro días“, sentenciou.
CONCENTRACIÓN
Posteriormente, no exterior do Consistorio, estaba prevista unha concentración onde participou toda a corporación, ademais da subdelegada do Goberno en Lugo e distintos representantes da Deputación. Tras cinco minutos durante os que afloraron as bágoas entre algúns dos asistentes, soou un intenso aplauso en lembranza da vítima.
Do mesmo xeito, Galicia enteira inzouse de concentracións de repulsa ante o crime machista. En Santiago, diversos políticos expresaron a súa dor ante este asasinato, que non fai máis ca confirmar unha problemática real e que debe ser abordada urxentemente.
“Hai cousas que se poden evitar, somos moito de protocolos pero logo solucionámolo cun minuto de silencio, con declaracións de tres días de loito e con concentracións que en definitiva á vítima non a axudan a nada e só redundan no lucimento de quen os fai. Así de claro, así de doloroso e así de tallante, pero é o que hai”, sostivo a presidenta da asociación ‘Si, Hai Saída’, Marta Rodríguez Engroba.
NON HABÍA DENUNCIAS
O delegado do Goberno en Galicia, Javier Losada, confirmou que non constaban denuncias previas contra o detido. “En moitos casos non hai ningún dato previo que permitira unha acción preventiva”, dixo, tras afirmar que denunciar pode “salvar vidas”.
