O PP de Lugo reclamou este luns un plan para eliminar os “tapóns urbanísticos” en distintos barrios cidade e “evitar que estes atrancos en vía pública se eternicen no tempo”.

Nun comunicado remitido aos medios, o portavoz do Grupo Popular de Lugo, Antonio Ameijide, asegurou que detectou “ata unha vintena de tapóns urbanísticos” durante un “recoñecemento” realizado en diferentes zonas da cidade.

“Moito nos tememos que, de non aceptar a nosa petición, seguirémolos sufrindo durante moitos anos“, manifestou o portavoz popular, que criticou que nas últimas dúas décadas “apenas se avanzou na supresión destes embudes urbanísticos”. Sinalan que, se nese tempo o PSOE “se molestase en eliminar tan só un por ano, hoxe non quedaría ningún”, asegurou o popular, que pediu a elaboración dun censo no que se dean prioridade “ás actuacións en casos nos que hai perigo para os cidadáns”.

O portavoz popular recoñece que “é imposible” eliminalos todos “de golpe“, tanto pola complexidade administrativa como pola carga económica. “En calquera caso é necesario afrontar o asunto sen máis demora para que se supriman no menor tempo posible”, indicou.