A praga de ratas xa afecta a oito concellos da provincia de Lugo. En total, a superficie prexudicada sitúase nas 1.629,63 hectáreas nun total de 2.995 parcelas.
Así o reflicten as declaracións de danos feitas polos propios afectados. Determinouse que os concellos lucenses que sofren a presenza de ‘ratas topo’ son As Nogais, Baralla, Cervantes, Folgoso do Courel, Navia de Suarna, Pedrafita do Cebreiro, Samos e Triacastela. Con esta información, técnicos da Consellería do Medio Rural desprazaranse de novo á zona damnificada para determinar a poboación de roedores e avaliar as posibles medidas a adoptar, sempre de acordo coa normativa vixente.
SOLUCIÓNS DA XUNTA
Segundo lembrou a Xunta o un comunicado, o persoal da Consellería xa traballou sobre o terreo no pasado novembro. Naquel momento, os gandeiros e agricultores afectados comprometéronse a trasladar os datos de incidencia despois da ponte da Constitución. Posteriormente, eles mesmos solicitaron que se ampliase ese prazo, de maneira que quedou fixado para despois de Reis.
A partir de agora volverán manterse reunións cos afectados para avaliar e acordar as medidas a aplicar. Así, analizaranse os diferentes métodos de loita contra este animal, sempre que estean permitidos pola lexislación e que sexan compatibles coa actividade gandeira e co medio ambiente. Os afectados trasladaron á Xunta que as medidas a levar a cabo non terían efecto en períodos de choiva nin de neve, unhas condicións que se mantiveron desde novembro de 2019 ata practicamente finais do pasado ano.
