Os alcaldes que presidiron a corporación de Lugo no últimos corenta anos de democracia recibirán este sábado a Medalla de Ouro da cidade, a máis alta distinción que concede a administración local, polo servizo prestado aos veciños do municipio e a súa dedicación á institución municipal.

A proposta da actual alcaldesa, Lara Méndez, foi validada polos demais grupos da corporación municipal en pleno, mediante un acordo por unanimidade para conceder a Medalla de Ouro da cidade aos exalcaldes Xosé Novo Freire, Vicente Quiroga, Tomás Notario, Joaquín García Díez e José López Orozco.

“Este ano, no que celebramos o corenta aniversario da chegada da democracia ao noso país, o pleno do Concello de Lugo quere recoñecer o labor dos alcaldes que estiveron á fronte do Concello desde que en abril de 1979 os votos dos e das lucenses impulsaron unha nova etapa de apertura, liberdade e modernización”, dixo a alcaldesa.

O acto celebrarase este sábado, 30 de novembro, a partir das 12:00 horas, no Museo Interactivo da Historia de Lugo (MIHL).