A Comisión Escolar de Alertas decidiu manter para este venres, día 15 de novembro, a suspensión da actividade lectiva na zona da Montaña de Lugo ante o aviso de fenómeno meteorolóxico adverso de nivel laranxa por espesores de neve superiores a 20 centímetros.
A presenza de neve na rede viaria da montaña de Lugo e Ourense deixou sen poder acudir ás aulas a 1.009 alumnos de 29 centros educativos das dúas provincias.. Segundo os datos facilitados pola Consellería de Educación, amplían tamén a mañá a suspensión das clases.
Os 15 centros coas clases suspendidas na provincia de Lugo corresponden aos concellos de Baleira, Baralla, Becerreá –dous–, Cervantes, Folgoso do Courel, A Fonsagrada –dous–, O Incio, Navia de Suarna, Negueira de Muñiz, As Nogais, Samos, Pedrafita do Cebreiro e Triacastela.
Ademais, 20 estudantes do CPI de Castroverde quedaron sen clase; xunto con outra vintena do IES Xograr Alfonso Gómez de Sarria e tres da CEE Santa María de Lugo.
Mentres, na provincia de Ourense resultaron afectados 26 estudantes de oito centros educativos situados nos concellos de Carballeda de Valdeorras, Castro Caldelas, A Veiga, A Pobra de Trives, Verín, Allariz e Bande –do IES Aquis Querquernis e do CEIP Xoaquín Lourenzo Xocas–.
ACONDICIONAMENTO DE ESTRADAS
A Deputación de Lugo traballa desde a pasada medianoite no acondicionamento de máis de 40 vías da súa titularidade en 12 concellos debido ao temporal de neve e choiva que afecta á provincia.
Coa finalidade de atender as incidencias ocasionadas polo mal tempo e garantir a seguridade viaria, a Deputación informou de que funcionan tres máquinas quitaneves e tres vehículos todoterreo con material de apoio nos municipios da Montaña e do sur de Lugo. En cada unha do resto de zonas está operativa unha máquina quitaneves e un todoterreo.
O presidente da Deputación, José Tomé, que dirixe a área de Xestión Territorial, informa de que “se está traballando coa maior celeridade posible” para “atallar os problemas que este temporal está a deixar nas estradas da provincia”.
“A maior dificultade agora mesmo está nas vías de Cervantes, onde as capas de neve superan os 15 centímetros, e tamén en Pedrafita do Cebreiro, onde xa se alcanzan os 10 centímetros”, esgrimiu. As vías afectadas pola neve están en Baleira, Folgoso do Courel, Cervantes, O Incio, Navia de Suarna, Negueira de Muñiz, As Nogais, Pedrafita do Cebreiro, Quiroga, Ribeira de Piquín, Samos e Triacastela.
