A Federación de Servizos de CCOO Galicia fixo un chamamento ao resto de organizacións sindicais con representación no sector do comercio de alimentación da provincia de Lugo para “impulsar, de xeito conxunto”, a apertura da mesa negociadora do convenio colectivo, que está vencido desde o pasado mes de xaneiro de 2026. Nun comunicado, CCOO sinala que considera urxente iniciar canto antes este proceso para actualizar as condicións laborais e salariais das persoas traballadoras do sector. A organización subliña “a necesidade imperiosa” de reforzar os dereitos laborais nun eido que define como “esencial” para a economía e o consumo de toda a provincia.
Neste sentido, o sindicato trasladou formalmente a UGT e CIG —as organizacións con maior representatividade no sector— a súa “total disposición a traballar desde a unidade sindical”. “O diálogo e a coordinación entre as distintas organizacións sindicais son fundamentais para fortalecer a capacidade de negociación fronte á patronal e favorecer avances efectivos”, aseguran desde Comisións Obreiras. CCOO insiste así na importancia de artellar unha fronte sindical común que permita abordar a negociación do novo convenio con garantías e avanzar na mellora das condicións laborais dun sector clave na provincia de Lugo.
