A Deputada de Réxime Interior, Promoción do Territorio e Turismo, Pilar García Porto, participou este martes na Facultade de Veterinaria na inauguración das xornadas técnicas da Cost Action BeSafeBeeHoney. Unha cita organizada pola Universidade de Santiago de Compostela (USC) que reúne entre hoxe e mañá a unha vintena de investigadores e investigadoras co obxectivo de salvagardar a autenticidade e a calidade dos produtos apícolas.
“Lugo é unha provincia coñecida pola súa riqueza natural, máis do 80% do noso territorio está declarado Reserva da Biosfera, e o seu patrimonio cultural. Contamos con espazos protexidos de incalculable valor, que son refuxio da biodiversidade”, sinalou a Deputada. Destacou a tradición apícola da provincia, favorecida polo clima suave e a diversidade floral e animounos a coñecer o territorio. Nese sentido puxo en valor o modelo de turismo polo que aposta a institución provincial, “no que o visitante valore o que somos aquí, que desfrute da natureza con respecto, aportando valor ás economías locais”.
García Porto destacou tamén que “na Deputación mantemos un compromiso diferencial coa investigación, a educación e a transferencia de coñecementos porque sabemos todo o que reverte no benestar da sociedade.”
Participaron tamén no acto de apertura o Decano da Facultade de Veterinaria, Fernando Muñoz; a organizadora da Cost Action 22105, Andreia Freitas; a Directora de iTerra, Marta López; e a organizadora deste evento, Carolina Nebot; entre outras autoridades.
