As obras do cinto comarcal, a LU-P-1611, á altura do concello do Corgo, xa están rematadas logo dun investimento que supera o medio millón de euros. Neste vial realizaronse obras de pavimentación do firme en dous tramos. Unhas actuacións que se suman as xa realizadas neste vial nos últimos anos.
“Estamos a facer un esforzo investidor enorme nas estradas, destinando o 21% dos nosos fondos este ano a súa mellora, porque a mobilidade é un dos grandes piares da nosa acción de Goberno. Así o demostramos con actuacións coma esta”, destacou o presidente provincial, José Tomé, nunha recente visita a estas obras.
A actuación, que desenvolve a empresa Francisco Gómez y Cía, abarcou do Alto de Gomeán ata a parroquia de Marei –do punto quilométrico 0,1 ao 5,6- e á altura de Maceda –entre o 6,6 e o 7,5- consistiu na limpeza de cunetas, saneado do firme, pavimentación con aglomerado en quente, reposición da sinalización vertical e pintado da vía. A obra complementouse con outra que a Deputación vén de adxudicar entre os concellos de Begonte e Castro de Rei con preto de 350.000€ e que servirá para mellorar 4,6 quilómetros da vía, á altura da parroquia begontesa de Felmil e ao seu paso pola parroquia castrense de San Xiao de Mos.
As obras do cinto comarcal no Corgo enmárcanse no Plan de mellora das estradas que acondicionarán este ano 280 quilómetros de vías por toda a provincia con máis de 12M€. En concreto, para a LU-P-1611, a Deputación destinará por tramos máis de 2M€.
Nos últimos cinco anos, a Deputación de Lugo impulsou un total de sete proxectos para mellorar en diferentes tramos o cinto comarcal, esencial para as comunicacións da provincia, cun investimento duns 3,65M€. A institución provincial ten mellorado desde o 2020 máis de 35 quilómetros –case o 30%-da LU-P-1611 ao seu paso por Pol, Castroverde, Cospeito, Castro de Rei, Friol, Lugo, Guntín, O Corgo e Begonte. Un esforzo inversor importante nunha estrada que conecta un total de 11 concellos nos seus máis de 131 quilómetros.
