A Xunta de Galicia completou a primeira fase da ampliación do parque empresarial de Muimenta tras un investimento de 1,6 millóns de euros, segundo anunciou este venres a conselleira de Medio Ambiente, Territorio e Vivenda, Anxos Vázquez, durante unha visita a esta área industrial do Concello de Cospeito.

Esta ampliación permitiu incrementar a superficie do parque en case 25.000 metros cadrados, dos que case 13.000 metros serán 14 parcelas que oscilan entre os 423 metros e os 1.605 metros. Os restantes destinaranse a zonas verdes e vías.

Segundo recolle o Goberno galego nun comunicado, Vázquez explicou que a comercialización das parcelas xa se incluíu no concurso de venda convocado por Xestur o pasado mes de febreiro e a apertura das ofertas está prevista para os próximos días.

Neste sentido, indicou que os adxudicatarios destes terreos beneficiaranse da bonificación do 50% que a Xunta aplica á adquisición de parcelas nos parques empresariais da provincia de Lugo.

Esta primeira etapa da ampliación incluíu actuacións relativas á urbanización, as conexións ás redes de saneamento, de abastecemento, de telefonía e de electricidade e ás ligazóns coa estrada LU-120 e coas vías das que xa dispuña o parque.

“O ano 2022 foi un dos mellores en venda de parcelas en polígonos industriais coa adxudicación de 540.000 metros cadrados”, lembrou Ángeles Vázquez.