O alcalde de Palas de Rei, Pablo Taboada (PP), asegurou este martes que se dan “pasos firmes” para que a multinacional portuguesa Altri constrúa a súa planta de fibras téxtiles neste municipio.
“A realidade do día que se nos transmite aquí a nivel local é que no que son as autorizacións de obra vai todo máis ou menos segundo o planeado, con pasos firmes e unha presenza continua da empresa en Palas de Rei con moitas reunións e con moita firmeza e seguridade no investimento. Non temos ningún motivo para desconfiar do que se poida dicir nun informe. É unha multinacional e como tal ten os seus tempos”, subliñou o rexedor.
Taboada insistiu neses “pasos firmes” dados na adquisición da parcela, ademais do “estudo xeotécnico” e o “permiso arqueolóxico” xa obtido para facer as prospeccións arqueolóxicas necesarias na zona.
O alcalde fixo estas declaracións despois de que durante o fin de semana a empresa pasteira deslizase que se podería atrasar a posta en marcha da devandita factoría de fibras téxtiles. Neste contexto, esgrimiu que “influirá a disposición do goberno de incluír este proxecto dentro dos fondos de recuperación” da Unión Europea.
“Había esa dúbida e iso quedou máis claro tras a reunión que mantiveron en Madrid o presidente da Xunta (Alfonso Rueda) e o presidente do goberno (Pedro Sánchez). A perspectiva é boa para que se inclúa dentro dos fondos de recuperación de Europa. A partir de aí, entendo que se dan os pasos máis firmes para pechar o proceso”, ponderou.
En canto á parcela que ocupará esta nave, Taboada confirmou que “fai un par de semanas foise á notaría, asinouse un acordo e unha opción de compra”, polo que “agora só quedan os permisos pertinentes”.
“Xa se fixo o estudo xeotécnico, agora vai o permiso arqueolóxico, un permiso que se concedía a semana pasada. Os investimentos ata agora son importantes, porque hai un persoal que está constantemente aquí para rematar o proxecto de execución”, concluíu o alcalde de Palas de Rei.
