O presidente da Asociación Provincial de Empresarios de Hostalaría de Lugo, Cheché Real, afirmou este martes que o sector non ve “viable” levar un rexistro de identificación dos seus clientes, entre outras cousas, porque non é o seu labor pedir os datos dos usuarios: “Eu non son ninguén para dicirlle a alguén que se identifique“, sinalou.
Así o dixo despois de que a Xunta trasladase ao sector a proposta de que a hostalaría conte na súa desescalada cun rexistro de clientes para facer seguimento de contactos ante posibles gromos, unhas medidas para as que aínda non hai data.
Así, Real censurou que se estableza “un control de acceso mediante un código QR”, unha das propostas da Xunta, algo que non ven viable porque “a xente non ten por que ter un teléfono móbil nin ter a aplicación baixada”.
En canto á posibilidade de facelo manualmente ou con outro sistema, destacou que os hostaleiros tampouco ven factible que sexa o empresario o que teña que “collerlle a afiliación ou a identificación” ao cliente, xa que “ese non é o labor do hostaleiro, senón máis ben das forzas e corpos de seguridade do Estado”.
Outro aspecto sobre o que queren información é sobre a capacidade máxima permitida, dado que “as licenzas antigas si teñen identificado o número de persoas que poidan estar no interior, pero as de 15 anos para esta parte non o poñen”.
TRABAS NAS AXUDAS
Á súa vez, Cheché Real referiuse ao segundo plan de axudas da Xunta e aos requisitos para obtelas. “Outro dos problemas que viamos é que, transcorridos tantos meses e tantos días, nas circunstancias que nos atopamos con restricións e peches, hai un 75 por cento de empresas que son debedoras da administración, que se deixou de pagar algún recibo á Seguridade Social ou de autónomos”, subliñou.
Por iso, unha das cuestións que trasladaron á Xunta é como “pode ser posible saltar” a obriga de estar ao día no pago a distintas administracións para obter as axudas. “Pola contra, estas axudas chegarían a unha mínima parte da xente, porque o que máis e o que menos ten algunha débeda, incluso unha multa de tráfico”, resolveu.
