Un veciño de Outeiro de Rei que morreu aos 83 anos sen testamento e sen sucesores. O pasado 9 de decembro, o Diario Oficial de Galicia (DOG) publicou unha resolución pola que se iniciaba o procedemento para declarar á comunidade autónoma como herdeira ‘ab intestato’ deste home, do mesmo xeito que o fixo con outras 74 persoas nos 10 últimos anos.

Son as herdanzas intestadas, polas que a comunidade ingresou na última década algo máis de 200.000 euros de unicamente sete liquidacións, debido a que estes procedementos son longos e adoitan aparecer herdeiros. Cando hai liquidación, o diñeiro destínase a fins asistenciais ou culturais.

“Intúo que as herdanzas sen testamento non son moitas, é máis, creo que a administración herda máis pola adxudicación de valores, contas correntes, etcétera, en presunción de abandono, isto é, cando pasaron máis de 20 anos sen practicarse xestión algunha”, destaca o profesor da Universidade de Vigo Alberto Vaqueiro.

En declaracións a Europa Press, Vaqueiro, membro do Foro Económico de Galicia, alude a este tipo de herdanza “silenciosa” que estima que é máis habitual que o caso das intestadas. En canto ao perfil do falecido sen testamento e sen sucesores, e o tipo de patrimonio máis habitual, non hai estatística “que mostre tanto detalle”.

TRES FASES

Neste tipo de herdanzas, a norma fixa tres fases. A primeira delas, de actuacións previas, é na que se investiga se o falecido ten ou non herdeiros, sexan legais ou testamentarios. En 2018 abríronse 77 investigacións, segundo datos da Consellería de Facenda solicitados por Europa Press. En 2019 foron 44 e no que vai de 2020 son 32 as iniciadas.

Facenda aclara que “moitas das investigacións iniciadas nun determinado ano non pasarán á fase de declaración de herdeiros, posto que a administración adoita atopar herdeiros preferentes”.

A segunda etapa, a de procedemento para a declaración administrativa de herdeiros, é a que arrinca se a administración comproba a priori que aparentemente o falecido non ten herdeiros. Trátase dun procedemento para declarar herdeira á comunidade autónoma mediante a publicación no BOE, no DOG e na web da consellería, entre outros.

Nunha década houbo un total de 75 declaracións da comunidade como herdeira: seis en 2010, sete en 2011, 19 en 2012, sete en 2013, oito en 2014, nove en 2015, catro en 2016, tres en 2017, seis en 2018, tres en 2019 e outro tres en 2020.

Por último, existe unha última fase de liquidación da herdanza, na cal se liquida o patrimonio para destinalo a fins asistenciais ou culturais, tal e como establece a lei de dereito civil de Galicia. En 2019 e 2020 non houbo ningunha liquidación. Desde 2010 e ata o momento, a comunidade galega ingresou un total de 212.954,85 euros de sete liquidacións.

A consellería precisa que este tres procedementos son trasversales no tempo, posto que se dilatan durante varios anos.