O presidente da Asociación Provincial de Empresarios de Hostalaría de Lugo, Cheché Real, cualificou de “insuficiente” a apertura de locais que proxecta a Xunta de Galicia que, no caso da capital da provincia supón poder abrir ata as 17:00 horas ao 30% como máximo nos interiores e ao 50% nas terrazas. “Non podemos seguir así, é absurdo traballar ao 30%”, lamentou.
Non só pensan que se quedan curtas as medidas, senón tamén as axudas establecidas polo Goberno galego. “Moita xente vai quedar polo camiño, non van acceder a esas axudas. Moitos establecementos están a desexar abrir as súas portas, moitos destes locais contan con varios traballadores e van ter que seleccionar estes traballadores porque a este ritmo non poden coller todo o persoal ao cento por cento“, advertiu.
Sexa como sexa, Cheché Real expresou que no sector albergan “esperanzas” e confían que a próxima semana poidan “abrir ao 75%, para ter unha mínima calidade laboral”.