O tempo para a negociación esgótase. O cento de traballadores que aínda quedan na central de Anllares verán a súa marcha adiantada por mor dos plans do goberno central. Logo do informe de xuño da Comisión Nacional dos Mercados e a Competencia (CNMC), autorizando o peche das instalacións por non afectar á garantía do subministro eléctrico, agora é o Ministerio para a Transición Ecolóxica o que tramitará o permiso de clausura nas vindeiras datas.

A autorización do departamento que dirixe Teresa Ribera chegará nun prazo de apenas semanas, segundo adiantou El Economista. Anllares será a primeira térmica do Bierzo en ser desmantelada, un proceso que afectará proximamente á central Compostilla II, a meirande de Castela e León, onde funcionan só dous dos cinco grupos.

Este será o destino inminente das sete térmicas españolas que operan por enriba límites de contaminación e que non realizarán modernizacións no seu funcionamento. O Congreso aprobou un escenario de peche das instalacións que empregan carbón para 2020, obxectivo que comparte o novo goberno socialista, que vencella o mantemento do resto de centrais altamente contaminantes á evolución do resto de operadores do mix enerxético.

Co permiso da CNMC, Transición Ecolóxica poderá iniciar a desconexión destas centrais sen incidencia no subministro eléctrico aínda que non incremente o número de megavatios instalados. Anllares supoñía unha xeración de 350 MW e tivo que recorrer a un permiso especial para seguir operando alén de 2013. A central berciana xa non cumpría cos estándares europeos de contaminación e excedera o límite de horas de máxima producción.

Así e todo, as dúas compañías participantes de Anllares solicitaron autorización para a clausura en 2017. Endesa e Naturgy –antiga Gas Natural Fenosa– non teñen interés en manter estas instalacións deficitarias, nin en asumir o custe de adaptalas ás normas comunitarias. Os fondos irán adicados ao desmantelamento da central, que terá que producirse antes de tres anos despois da orde ministerial.