Ante a parálise causada pola crise do coronavirus, o turismo érguese como un factor para reactivar a economía dalgunhas áreas. Para o caso da provincia de Lugo, a Xunta traballa nun plan de recuperación canda os representantes dos xeodestinos da Mariña, Ribeira Sacra, Ancares-Courel e o xoeparque Montañas do Courel.

Segundo o delegado territorial da Xunta en Lugo, José Manuel Balseiro, nas últimas semanas presentáronse na provincia 1.326 Expedientes de Regulación Temporal de Emprego (ERTES) procedentes de empresas do sector turístico. Todos eles, agás un, foron aceptados, tal como sinalou. Desta maneira, cóntase un total de 4.830 traballadores afectados, dos cales 4.745 teñen suspensión de contrato e o resto, redución de xornada.

Con este panorama, a Xunta propón “traballar na promoción de Lugo como destino seguro” para darlle pulo ao sector. Entre as primeiras medidas, subliñou o desenvolvemento dun plan de seguridade hixiénico-sanitaria para intensificar a confianza de traballadores e usuarios, ou o Plan de teleformación a través do Centro Superior de Hostelería de Galicia (CSHG). Podes ler máis información no Xornal de Lemos.