Os irlandeses The Undertones, Christina Rosenvinge e os xaponeses Stompin’Riffraffs encabezan o cartel da nova edición do festival FaCeLa Fest, que terá lugar entre os días 8 e 10 de maio en Lugo. Este tres artistas de primeira orde compartirán cartel cos lucenses Jade 4, Grande Amore, Lorahacepam, Os Revelators e Moloch; ademais de VVV[Trippin’you], Margaridas Podrecidas, Marcelo Criminal, Black Ends, Kokoshka e As Petunias.
O festival foi presentado este venres polos organizadores do evento xunto ás administracións que apoian este festival independente. Así, estiveron representantes do Concello, por medio de Maite Ferreiro; da Deputación, con Iria Castro, e da Xunta de Galicia, con Javier Arias. O FaCeLa Fest é un festival de autor onde “se prima unha cousa por encima de todo: a calidade das bandas participantes”, explicou Maite Ferreiro, destacando ademais, que se diferencia doutros festivais de música polo seu “coidado e arriscado cartel”.
Tamén puxeron en valor a presenza de agrupacións lideradas por mulleres e polos grupos de Lugo, así como “o traballo da organización para incluír cada ano no cartel bandas emerxentes que sorprenden“, recalcou a deputada Iria Castro. O auditorio Gustavo Freire será novamente o marco deste festival de autor.
