A Deputación de Lugo investirá un total de 36.000 euros en senllos actos para homenaxear á Banda de Música de Antas de Ulla. Desta contía, 18.000 euros irán para a exposición ‘125 anos resoando no Corazón da Galicia’, que se inaugurará este sábado no Castelo de Pambre de Palas de Rei.
A outra metade, outros 18.000 euros, irán destinados para a realización de accións conmemorativas, como a edición dun libro que documenta o percorrido da formación. A mostra de Palas será presentada pola deputada de Réxime Interior, Promoción do Territorio e Turismo, Pilar García Porto, na sala de exposicións do castelo ás 12,00 horas.
A exposición estará composta por sete monólitos e será de acceso gratuíto. Poderase visitar ata o domingo 29 de maio de martes a domingo con horario de 11,00 a 14,00 e de 16,00 a 20,00 horas. Ademais, tras Antas de Ulla e Palas de Rei, a actividade trasladarase a Monterroso no mes de xuño.
