O FIV de Vilalba anunciou este xoves as últimas incorporacións ao Escenario Emerxente deste 2022, con nomes como The Zephyr Bones, Kokoshca, Juárez, Fábrica de Espejos e a Banda de Música de Vilalba, que pechan o cartel xunto cos dg Isaac Peces, Saya e Russ.
Do 22 ao 24 de abril, Vilalba gozará de diversas actuacións e actividades repartidas entre os escenarios situados na Praza da Constitución, o Escenario Emerxente, e no Campo da Feira, o Escenario FIV, seguindo os protocolos vixentes no momento da celebración do festival, garantindo ante todo a seguridade de público e artistas.
O primeiro dos novos nomes en unirse ao cartel do FIV de Vilalba é a “cabeza de cartel” máis esperado, explicou a organización, a Banda de Música de Vilalba, que será a encargada de interpretar un divertido recital de versións do mellor pop-rock nacional, pero tamén internacional.
Así mesmo, o escenario Emerxente tamén suma o fondo psicodélico e as progresións case jazzísticas do pop de The Zephyr Bones, e a banda Juárez, con ‘Luna Menguante’. Os pamploneses Kokoshka e a banda de ‘synth pop altamente emocional’ Fábrica de Espejos tamén figuran no festival.
