EFE | A Deputación de Lugo e o cineasta Oliver Laxe firmaron esta mañá o convenio de colaboración para construír a sede da Asociación Ser, promovida polo director de ‘O que arde’ para impulsar actividades socioculturais e accións de desenvolvemento rural na comarca dos Ancares.

A través dese convenio, a Deputación de Lugo achegará 36.000 euros para a reconstrución dunha antiga casa tradicional nun edificio de baixo consumo enerxético na aldea de Vilela, no municipio de Navia de Suarna.

Segundo informou o goberno provincial, a Casa Quindós “será o primeiro inmoble privado de uso público construído en Galicia baixo o estándar Passivhaus”, que garante “o benestar e o confort térmico, fornecendo enerxía para a calefacción ou para a refrixeración só a través do aire de ventilación”, cun aforro enerxético que pode chegar ao 90% en relación co gasto dunha vivenda convencional.

O centro que albergará a sede da Asociación Ser é unha antiga casa familiar ligada a unha explotación agropecuaria e forestal, “típica das montañas lucenses”, situada na aldea abandonada de Vilela, que será rehabilitada.  Dispón de 350 metros cadrados repartidos en dúas plantas e foi edificada a finais dos anos 70 sobre os restos dunha antiga palloza.

A Casa Quindós de Vilela será un “punto de encontro” para desenvolver iniciativas vinculadas aos sectores agrogandeiro, turístico, sociocomunitario, cultural e ambiental nos Ancares, así como para xerar “proxectos empresariais”, que contribúan a asentar poboación no rural.