O portavoz adxunto do Partido Popular no Senado e senador por Lugo, José Manuel Barreiro, cualificou de “improvisación” a actuación do Goberno tras o derrube do viaduto do Castro, na autovía A-6, a 500 metros do municipio de Pedrafita do Cebreiro.
Unha situación que está a provocar retencións para atravesar o Concello de Pedrafita, con colas de ata dúas horas, segundo denunciaron os transportistas de Aetram.
Barreiro reprocha “unha falta de información tremenda” por parte do Ministerio de Transportes. “Aquí houbo unha actuación de urxencia, unha actuación dun número importante de millóns de euros e que ao final non serviu para nada, tampouco sabemos nada”, reprobou.
O portavoz adxunto dos populares na Cámara Alta demandou que “o Goberno non só ten que axilizar os traballos, os problemas que está a provocar son francamente graves, ademais cun incremento nos custos no sector do transporte”.
“O Goberno ten que trasladar información, porque asistimos a un escurantismo enorme, que é o que estamos a vivir con este problema da autovía en Pedrafita”, queixouse José Manuel Barreiro. O pasado venres caía un terceiro van do viaduto tras tres días de traballos para botar abaixo este alicerce, o terceiro desde o derrube da ponte no mes de xuño.
