Aínda que a seca aínda non causou restricións xeneralizadas no Concello de Castroverde, os seus efectos si se deixan notar. Así, o consistorio ten que fornecer de auga a dúas vivendas na parroquia de Espasande, segundo dixo este luns o alcalde, José María Arias.
Aínda que a situación non é aínda grave, o municipio si ten “algún caso puntual” de necesidade de auga e advirte dos efectos que terá que esta situación se alongue. Arias puxo o acento en que “o normal é que en agosto non haxa restricións de auga porque a seca afecta, sobre todo, aos meses de outubro e novembro”. “Eu non lembro unha situación así”, confesou o alcalde.
Por iso, pediu á veciñanza que “deixe de lavar coches, de regar hortos porque non hai unha previsión de choivas para os próximos días”, indica. “As choivas que caian son para o campo, para fontes e mananciais non afectan para nada. Mentres non haxa choiva de moitos días, os mananciais en setembro e outubro van secar”, concluíu.
