O BNG reclamou ao Goberno central “a máxima axilidade e rapidez” no desenvolvemento das obras que levan a cabo no viaduto do Castro, na autovía A6, tras o derrube en xuño dunha parte del “por causas que aínda hoxe se descoñecen”.

Foi a viceportavoz parlamentaria dos nacionalistas, Olalla Rodil, a que lembrou que a infraestrutura está inutilizada desde hai case tres meses, se ben é “estratéxica para o conxunto de Galicia, pero moi especialmente para a poboación de Lugo e tamén para os sectores económicos e produtivos do país”.

Estes, continuou, “están a sufrir un enorme prexuízo económico polo atraso nas obras”. Ademais, remarcou que “aínda están por esclarecer as razóns, as causas, polas que veu abaixo unha ponte que ten apenas 20 anos”. Esixen a este respecto que se acometan os estudos, as análises e as investigacións que procedan, ademais de auditar o resto de infraestruturas “que se atopen nunha situación semellante”.

“Moito nos tememos que hai un pacto de silencio entre o PP e o PSOE para tapar as razóns polas que unha ponte tan nova se derrubou e non arroxar luz sobre a responsabilidade que puidesen ter as empresas construtoras no sucedido”, sinalou Rodil.