O Concello de Lugo ten xa preparado o programa de actos da tradicional Ofrenda do Antigo Reino de Galicia, que se celebrará este fin de semana na capital lucense.
O encargado de realizar a Ofrenda este ano será o alcalde de Tui, Enrique Cabaleiro González, asumindo a representación dunha do sete antigas capitais do Reino de Galicia nun acto que se celebra de maneira ininterrompida en Lugo desde o século XVII.
Así, os actos comezarán o sábado coa celebración das Vésperas na Catedral de Lugo, ás 19.30 horas, ás que asistirán representantes institucionais e autoridades convidadas.
O acto central terá lugar o domingo, comezando ás 10.15 horas coa recepción oficial no Concello dos representantes das cidades do Antigo Reino de Galicia. Ás 10.30 horas terá lugar a firma no Libro de Honra por parte do delegado rexio e, ás 10.40 horas, iniciarase a procesión cara á Catedral.
Ás 11.00 horas celebrarase a misa na Catedral de Lugo e, unha vez acabada, ás 12.15 horas, terá lugar a tradicional procesión.
Está previsto que a este evento asistan a alcaldesa de Lugo, Elena Candia, xunto cos representantes das antigas cidades do Reino de Galicia: A Coruña, Betanzos, Mondoñedo, Ourense, Santiago de Compostela e Tui, ademais doutras autoridades civís, militares e relixiosas.
Nunha nota de prensa o goberno local destacou que é “fundamental” preservar e promover unha tradición, declarada Ben de Interese Cultural (BIC), que “representa unha parte esencial do pasado, presente e futuro”.
