A neve xa fixo acto de presenza, nalgúns momentos de forma copiosa, na Montaña de Lugo e obrigou á primeira hora da mañá os axentes do Subsector de Tráfico da Garda Civil a “embolsar” camións na Autovía do Noroeste (A-6) na zona de Gomeán, así como a restrinxir o paso de vehículos articulados pola zona de Pedrafita do Cebreiro.
De feito, segundo informa a Dirección Xeral de Tráfico (DXT), a circulación estivo condicionada e restrinxida ao paso de vehículos pesados desde as 07:38 horas entre os quilómetros 430 e 438, ou o que é o mesmo, entre Pedrafita do Cebreiro e Doncos.
Así mesmo, quedou prohibida a circulación de vehículos articulados e camións na estrada autonómica LU-633, entre o quilómetro 0, en Pedrafita do Cebreiro, e o punto quilométrico 19, situado xa no municipio veciño de Triacastela.
Tamén se recomendaba precaución aos condutores para circular polo Alto do Faro, no municipio de Chantada, e pola zona de Oural, en Sarria, onde tamén nevou durante a noite e á primeira hora da mañá.
No Alto do Fiouco, entre Mondoñedo e Abadín, tamén se recomendaba circular con precaución por mor da reducida visibilidade e os fortes refachos de vento.
Ante este fenómeno meteorolóxico adverso, con posibilidade de acumulacións de neve de até 20 centímetros na Montaña de Lugo, a Consellería de Educación tomou a decisión de suspender as clases en toda a zona afectada.
ACONDICIONAMENTO DE ESTRADAS
A Deputación de Lugo traballa desde a pasada medianoite no acondicionamento de máis de 40 vías da súa titularidade en 12 concellos debido ao temporal de neve e choiva que afecta á provincia.
Coa finalidade de atender as incidencias ocasionadas polo mal tempo e garantir a seguridade viaria, a Deputación informou de que funcionan tres máquinas quitaneves e tres vehículos todoterreo con material de apoio nos municipios da Montaña e do sur de Lugo. En cada unha do resto de zonas está operativa unha máquina quitaneves e un todoterreo.
O presidente da Deputación, José Tomé, que dirixe a área de Xestión Territorial, informa de que “se está traballando coa maior celeridade posible” para “atallar os problemas que este temporal está a deixar nas estradas da provincia”.
“A maior dificultade agora mesmo está nas vías de Cervantes, onde as capas de neve superan os 15 centímetros, e tamén en Pedrafita do Cebreiro, onde xa se alcanzan os 10 centímetros”, esgrimiu. As vías afectadas pola neve están en Baleira, Folgoso do Courel, Cervantes, O Incio, Navia de Suarna, Negueira de Muñiz, As Nogais, Pedrafita do Cebreiro, Quiroga, Ribeira de Piquín, Samos e Triacastela.
