O alcalde de Pedrafita do Cebreiro, José Luis Raposo Magdalena, entrou tamén no debate sobre o futuro presidente da Deputación de Lugo. Raposo, afín a Pedro Sánchez, tamén aspira a ser deputado provincial e nos últimos días teriase posicionado en contra da candidatura de Darío Campos porque no seu equipo “hai xenteque non actuou ben nos últimos anos”.

“Posiblemente non sexa Darío o que estorbe aí”, dixo Raposo a Efe, “pero pode haber no seu equipo xente que se cadra non o fixo como o tiña que facer”, indicou. En todo caso, o rexedor de Pedrafita recoñeceu que nestes momentos está “standby”, á espera de que o partido tome unha decisión en relación coa lista definitiva de deputados provinciais e con respecto ao candidato á presidencia da Deputación, dado que hai dous aspirantes recoñecidos; o presidente en funcións, Darío Campos, e o alcalde de Monforte de Lemos, José Tomé.

“Quero un bo candidato, que faga o mellor para a provincia de Lugo”, engadiu Raposo Magdalena, quen confía en que ese será o perfil “do que resulte elixido”. Un candidato que designará Santiago e Madrid e non os militantes da provincia de Lugo, onde os apoios están moi divididos na provincia pero nos que Darío Campos suscita moitas máis simpatías que Tomé.

Por iso, a alcaldesa de Lugo, Lara Méndez, pide que a cidade conte tamén cun representante na deputación, dado que achega “o 52% dos votos socialistas” polo Partido Xudicial. Lugo cidade posicionase, claramente, do lado de Darío Campos.

Un posicionamento que non comparte Raposo que tamén lle lembrou que a lista provisional de deputados decídese en función dos apoios cultivados na propia circunscrición, que aglutina 22 municipios. Ademais, lembra, a decisión definitiva está en mans da Comisión Federal de Listas de PSOE. Unha comisión que podería decidir que non sexa Darío Campos o presidente.