A presidenta da Federación de Anpas de Lugo (Fapacel), Isabel Calvete, denunciou o desmantelamento da unidade de ensino infantil do CPI de Cervantes, onde os nenos de tres anos terán que convivir con outros de ata dez anos.
Así, puntualizou que nese colexio quedan “catro nenos para infantil, hai previsión de que o curso próximo haxa outro catro ou cinco, pero quédannos catro e como son só catro non teñen dereito a un ensino de calidade”. “Pedimos á Xunta que rectifique, non se elimine esta aula e se descrimine positivamente ao rural. O rural hai que tratalo doutra forma”, sinala.
Calvete subliñou que “se o colexio oferta ensino infantil ten que situalos e farano probablemente cos compañeiros dos primeiros cursos de primaria e sen especialista“.
“Entrarán nenos de tres anos que os metes con nenos de oito, nove ou dez anos. Non sabemos moi ben como van facer o agrupamento, terán que adaptarse e os primeiros días estarán a chorar, estarán a chamar ás súas mamás. É un prexuízo para os nenos de infantil e tamén para os de primaria, e pódense ver desatendidos”, augurou.
O que ocorre no CPI de Cervantes é só un exemplo, advirte, dos “recortes” que está a impor a Xunta de Galicia na educación, con especial afectación aos municipios do rural. Isabel Calvete avisou de que se rebaixará o número de profesores en primaria e secundaria de toda Galicia, e a falta de datos xa adianta que se reducirá en secundaria en 450 profesores o próximo ano en toda a comunidade.
