O Deputado de Relacións Institucionais, Álvaro Santos Ramos, supervisou este xoves as melloras feitas pola Deputación na Montaña lucense na estrada LU-P-0508, que é a vía que une os municipios de Baralla e Becerreá con Navia de Suarna.

O Goberno Provincial destinou a estres traballos máis de 135.000 euros que permitiron a mellora de 2,5 quilómetros, comprendidos entre os puntos 4,5 e 7. As obras, que consistiron na rehabilitación do firme con aglomerado en quente, limpeza de cunetas, e incremento da seguridade a través da instalación de sinalización horizontal e vertical; executáronse, na súa maioría, no municipio barallense, así como un pequeno treito no Concello de Becerreá.

Santos salientou que «son obras moi necesarias por tratarse dun dos eixos de comunicación fundamentais na Montaña lucense, pois a estrada é empregada diariamente por centos de veciños que se desprazan entre os devanditos municipios. Estas obras, moi reclamadas polos veciños da zona, enmárcanse na liña de traballo que puxemos para mellorar as estradas provinciais lucenses, dentro da nosa aposta por unha Deputación coas persoas, social e sumamente rural».