EFE | A Vicepresidencia Segunda e Consellería de Economía, Empresa e Innovación da Xunta de Galicia informou da apertura dun expediente informativo á empresa Naturgy pola interrupción da subministración eléctrica en varias zonas da provincia de Lugo como consecuencia da borrasca Dora, que deixou “intensas nevadas” o 4 e 5 de decembro.
A Xunta de Galicia informa de que “en todo momento seguiu de preto a situación” e, por iso, decidiu abrir no día de hoxe “un expediente informativo” para que a distribuidora Naturgy achegue no prazo de cinco días hábiles información sobre o “tempo de interrupción do servizo e o número de afectados”. Sábese que en lugares como Baleira encadearon máis de tres días sen luz.
Tamén sobre o “tempo media de reposición do servizo e o número de efectivos empregado” para reparar as avarías. Ademais, a Consellería esíxelle que presente os datos “desagregados por concellos”.
“O obxectivo é determinar o adecuado cumprimento por parte da compañía titular das redes de distribución da súa obrigación de mantelas en adecuadas condicións de conservación e idoneidade técnica”, precisa a Xunta.
Tamén avisa de que “se se determina que houbo incumprimento desta obrigación e que se puxo en risco a garantía de subministración ou se xerou perigo ou dano grave para as persoas, os bens ou o medio ambiente, será incoado o correspondente expediente sancionador”.