O secretario da Asociación de Prexudicados pola Fauna Salvaxe (Asperfasa), Andrés Saavedra, alertou este luns do risco de peche que pende sobre “2.000 explotacións” gandeiras galegas polos ataques dos lobos.

Saavedra compareceu en rolda de prensa acompañado da secretaria xeral do Sindicato Labrego Galego, Isabel Vilalba, para anunciar accións reivindicativas ante estes ataques da fauna salvaxe e a falta de resposta por parte das administracións.

Deste xeito, o secretario de Asperfasa tachou a situación de “desesperante e alarmante”. “Os danos cada anos son máis cuantiosos, tanto do lobo como do xabaril”, constatou. Ademais, puxo o acento en que as poboacións de xabaril e lobos “seguen crecendo en Galicia e os danos aínda máis”. “O lobo está a pór en perigo o peche de 2.000 explotacións (gandeiras) en Galicia”, reiterou.

Pola súa banda, a secretaria xeral do Sindicato Labrego Galego anunciou mobilizacións conxuntas, o 8 de maio, e apuntou que “se van a tentar sumar máis apoios”. Vilalba finalmente avisou que a “superpoboación do xabaril está a chegar ao nivel de praga en toda Galicia”. “Os ataques son constantes, levantando prados. Cada vez fan máis dano”, sostivo para pedir a intervención das distintas administracións co fin de combater estas “pragas”.