Eran as 02:28 horas deste martes, 21 de agosto. A terra tremou en Monterroso. Un terremoto de 4,1 graos de intensidade na escala Richter fixo saltar da cama a moitos veciños.
O Instituto Xeográfico Nacional confirma que o epicentro do sismo foi a 12 quilómetros de profundidade e sentiuse en varias poboacións da zona, como a localidade de Taboada, onde nunha escala de 1 a 10, percibiuse cun nivel catro. Afortunadamente non houbo nin danos persoais nin materiais.
O terremotou tamén se notou en Arzúa, Cacheiras, Chantada, Lugo capital, Santiago de Compostela, Sarria, Tui e Vilalba, de acordo á información recompilada polo Instituto Xeográfico Nacional.
Tres terremotos sentidos no último mes
No último ano, toda esta zona xa rexistrou 23 terremotos, aínda que só tres foron percibidos pola poboación e tiveron lugar nos últimos días: O 2 de agosto, o 10 de agosto e o que se produciu este martes.
Tras producirse o tremor, o Centro Integrado de Atención ás Emerxencias (CIAE) 112 Galicia recibiu varias chamadas de veciños de Monforte, Guntín, Antas de Ulla, Cospeito, Oroso, O Saviñao e A Estrada, que aseguraron sentir como se movía o chan sen que se chegasen a producir danos persoais nin materiais.
