Galicia encara o novo alivio das restricións fronte á Covid-19 –que desde este sábado inclúen reunións de seis persoas en interior e 10 en exterior, así como aumento de aforamentos– con 2.400 casos activos –unha vintena menos– e a presión hospitalaria en descenso con 121 pacientes ingresados, tres menos.
Concretamente na área de Lugo, segundo os datos actualizados na mañá deste venres pola Consellería de Sanidade con rexistros ata as 18,00 horas deste xoves, a situación de pandemia mantense estable. En canto á presión hospitalaria, seguen dúas persoas en críticos e 11 noutras unidades. Con todo, soben os casos activos en 11 (ata os 233 totais) tras rexistrar 21 contaxios novos nas últimas horas.
Polo seu lado, a taxa de positividade no conxunto de Galicia mantense por baixo do 2% desde o inicio desta semana ao ascender moi lixeiramente ao 1,71 por cento, despois de situarse no 1,67% a xornada pasada e nun 1,65% o día anterior, tras reducirse a un 1,26% no inicio da semana Así, segue por baixo do 5% que a Organización Mundial da Saúde (OMS) fixa para dar por controlada esta pandemia. A última vez que Galicia excedeu esta barreira foi o 15 de febreiro.
