A Xunta de Goberno Local aprobou os proxectos de modificación de distintas ordenanzas fiscais municipais, que incorporan novos incentivos para favorecer a implantación de actividades económicas e a ampliación das existentes cando leven aparellada a creación de emprego indefinido.

Estas medidas forman parte dos pasos necesarios para a incorporación de Lugo á iniciativa galega de Concellos Emprendedores, Doing Business Galicia, e contemplan bonificacións de ata o 80 % no ICIO, no IBI e no IAE.

As porcentaxes establécense en función dos novos postos de traballo creados: un 50 % para entre 1 e 10 empregos, un 75 % para entre 11 e 20 e un 80 % para 21 ou máis. Os novos contratos deberán ser indefinidos, a xornada completa e destinados a persoas desempregadas inscritas como demandantes de emprego.

No Imposto sobre Construcións, Instalacións e Obras (ICIO), a modificación da Ordenanza Fiscal nº 202 incorpora unha bonificación para as obras vinculadas á implantación de novas actividades económicas ou á ampliación das existentes que cumpran estes requisitos. Os postos de traballo creados deberán manterse durante os tres exercicios posteriores á finalización das obras.

No Imposto sobre Bens Inmobles (IBI), a modificación da Ordenanza Fiscal nº 203 establece unha bonificación para os inmobles nos que se desenvolvan estas actuacións. Terá unha duración de tres anos, sempre que se acredite o mantemento dos novos postos de traballo durante o período bonificado.

Pola súa banda, a modificación do Imposto sobre Actividades Económicas (IAE) incorpora unha bonificación durante tres exercicios para as empresas que implanten unha nova actividade ou amplíen as súas instalacións e creen emprego indefinido no municipio. Deberá producirse un incremento neto do persoal e os novos contratos, ao igual que nos anteriores, deberán ser indefinidos, a xornada completa e destinados a persoas desempregadas inscritas como demandantes de emprego.

A proposta de modificación do IBI tamén introduce cambios noutras bonificacións. No caso das familias numerosas, mantéñense as bonificacións do 30 % para a categoría xeral e do 50 % para a categoría especial na vivenda habitual. A modificación introduce unha novidade para os supostos de separación ou divorcio: considerarase vivenda habitual de cada proxenitor aquela na que estea empadroado, debendo os fillos e fillas que integran o título de familia numerosa estar empadroados na vivenda habitual de calquera dos proxenitores.

Para os inmobles vinculados a actividades agrarias e gandeiras declaradas de interese ou utilidade municipal, mantense a bonificación do 95 % durante tres anos. A novidade é que se aplicará desde o período impositivo seguinte ao da presentación da solicitude, en lugar de facelo desde o exercicio seguinte ao da concesión.

Tamén se concreta a consideración de vivenda habitual e a documentación necesaria para solicitar a bonificación do 50 % durante tres períodos impositivos pola instalación de sistemas de aproveitamento da enerxía solar para autoconsumo.

O remate da vixencia do convenio asinado no seu día entre o Concello de Lugo e a Xunta de Galicia, polo que se contemplaba a exención do IBI, queda agora reflectido na modificación da Ordenanza Fiscal. O actual Goberno municipal manifesta a súa vontade de continuar a senda de colaboración coa Xunta de Galicia, tendo en conta o escenario de investimento planificado para a cidade, con actuacións como a rehabilitación integral da Milagrosa, a adecuación dun edificio do CIS para saúde mental ou a construción do novo centro do Sagrado Corazón.

Rodaxe

No Imposto sobre Vehículos de Tracción Mecánica (IVTM), a modificación da Ordenanza Fiscal nº 200 amplía de tres a cinco anos a duración das bonificacións para os vehículos menos contaminantes. A proposta contempla unha redución do 50 % para os híbridos e do 75 % para os eléctricos, os de emisións nulas e os que empreguen os combustibles alternativos previstos na ordenanza. Estas bonificacións deberán solicitarse expresamente.

Finalmente, a modificación da Ordenanza Fiscal Xeral cambia o criterio de aplicación do importe mínimo de 1.000 euros de débeda principal pendente para a derivación da acción de cobro por sancións de tráfico. Nos supostos nos que o propietario sexa responsable, este límite vincularase ao vehículo, en lugar de ao conxunto do expediente executivo aberto ao infractor.

Os proxectos serán elevados ao Pleno para a súa aprobación inicial. A previsión é que as modificacións entren en vigor o 1 de xaneiro de 2027, unha vez completada a tramitación e publicada a súa aprobación definitiva no Boletín Oficial da Provincia.