O equipo de goberno de Palas volve a integrarse no Partido Popular. O regreso prodúcese trala sentenza do Tribunal Supremo que anula as condenas do actual alcalde, Pablo Taboada, o seu predecesor e outros sete encausados. A decisión foi trasladada á dirección provincial despois da xuntanza deste martes, na que participaron Elena Candia, Carlos Armesto, José Manuel Balseiro e José Manuel Barreiro.

Os procesados por acoso e prevaricación deixaran as filas da formación por mor da condena da Audiencia Provincial, revocada polo alto tribunal. A pena para o actual alcalde, Pablo Taboada, ascendía a nove anos de inhabilitación e quince meses de cadea. O Supremo entende que non se cumpren os requisitos para probar o acoso laboral, como tampouco de que os edís actuaran con conciencia de estar dictando unha resolución arbitraria contra a secretaria municipal.

Como consecuencia da absolución, Taboada volve a ser o candidato do Partido Popular de cara ás eleccións locais de maio, ofrecemento que Candia realizara en xaneiro. O rexedor afirma que “séntese moi motivado” e que “nunca deixei de estalo, porque sabía que todo ía saír ben”. Así e todo, recoñece que o episodio “non foi sinxelo”, e congratúlase do regreso de Alba Villasante, a concelleira de confianza de Taboada que decidiu absterse na votación pola que os compañeiros resultaron investigados.

Sobre a volta de Taboada, a presidenta provincial dos populares, Elena Candia, cre que “sae notablemente reforzado”. Nese senso, comentou que “somos conscientes de que Pablo viviu tempos complicados, pero, aínda así, non deixou de traballar polos veciños”.

A acusación contra o alcalde de Palas di que a sentenza xera impunidade