Cinco menores de sete anos tiveron que ser trasladados ao Hospital Universitario Lucus Augusti (HULA) despois de entrar en contacto con unhas pílulas brancas que atoparan no interior do autobús no que viaxaban de excursión. Os pequenos pensaron nun primeiro momento que se trataba de caramelos e algún deles chegou a chupar as pílulas.
Os pais acudiron cos nenos ao centro hospitalario despois de localizar a bolsa que contiña as pílulas e poñerse en contacto co servizo de urxencias do 061. En Urxencias de Pediatría, os menores foron sometidos a diferentes controis e permaneceron varias horas en observación. Ningún dos cinco escolares presentaba síntomas. Ademais, os testemuños achegados polos nenos foron distintos, xa que algúns aseguraron que non chegaran a tocar as pílulas, mentres que outro admitiu ter chupado algunha delas.
A bolsa foi entregada a axentes da Policía Nacional desprazados ata o HULA co obxectivo de determinar que substancia contiñan as pílulas. Segundo as primeiras apreciacións dos axentes, poderían tratarse de éxtase (MDMA), aínda que será preciso agardar ao resultado da análise toxicolóxica para confirmar a súa composición.
As pílulas non tiñan inicialmente aspecto de medicamento e, segundo os datos coñecidos, levaban unha palabra impresa, un elemento que pode aparecer en determinadas substancias estupefacientes. Polo de agora, non existe confirmación oficial sobre o contido delas.
PÍLULAS ESQUECIDAS POR ALGÚN USUARIO
A hipótese que se manexa sobre como chegaron as pílulas ao autobús é que puideron quedar esquecidas por algún dos usuarios que utilizaran anteriormente o vehículo. Estes transportes empréganse habitualmente para servizos moi diversos, desde desprazamentos particulares e celebracións ata excursións, polo que a bolsa podería ter quedado no seu interior tras unha viaxe anterior. Despois de permanecer baixo vixilancia médica e comprobar que non presentaban síntomas, os cinco menores recibiron a alta hospitalaria.
