EFE – Redacción | Nove participantes da XVII Ruta do Cádavo foron denunciados pola Garda Civil por modificacións ilegais nos todo terreos. Axentes do Grupo de Información da Agrupación de Tráfico (GIAT) constataron que as reformas non estaban recollidas na ficha da Inspección Técnica de Vehículos (ITV), e que incluso un dos 4×4 empregaba “un motor turbo de fabricación artesá”.
A revisión dos todo terreos foi realizada o pasado sábado, 23 de febreiro, con motivo da XVII Ruta do Cádavo, a proba de montaña celebrada en Baleira. A Garda Civil detectou modificacións sen verificar, que segundo estabelece o Regulamento Xeral de Vehículos, poderían comportar sancións administrativas de ata 500 euros por non demostrar o cumprimento dos requisitos técnicos.
Un dos todo terreos denunciados deberá ademais realizar unha ITV extraordinaria “perante a gravidade das deficiencias observadas”. Os axentes que revisaron o 4×4 constataron que as modificacións poderían “constituír un perigo para a seguridade viaria”, pois a ruta que partía do Cádavo discorreu por treitos de estrada abertos ao tráfico, ademais de zonas de monte. O vehículo en cuestión levaba instalado un motor turbo feito na casa.
