Un operativo conxunto da Policía Local, o Seprona da Garda Civil e a Sociedade Protectora de Animais e Plantas de Lugo permitiu este xoves retirar catro cans dunha vivenda situada no número 51 da rúa Lavandeira, na cidade de Lugo.
A actuación produciuse despois de varios días de xestións entre os colectivos de protección animal, os corpos de seguridade e a Xunta de Galicia ante as denuncias recibidas, que alertaban do estado dos animais e das condicións do inmoble.
Durante a intervención foron localizadas tres cachorras mestizas de sabuxo, duns dous meses, e un can adulto mestizo de fox terrier. O catro presentaban distintos signos de falta de coidados e foron trasladados ao Hospital Veterinario Universitario Rof Codina para a súa avaliación e tratamento.
Nas primeiras revisións veterinarias, o tres cachorras presentaban alteracións cutáneas, con perda de pelo, costras e picor intenso, síntomas compatibles con sarna. Ademais, dúas delas tiñan cortes na punta da cola e a terceira presentaba unha lesión nunha das orellas.
O can adulto mostraba tamén un estado físico deteriorado, coa pelame en malas condicións e unha lesión con bostela no bordo da orella esquerda. Os animais permanecen baixo atención veterinaria mentres continúan as actuacións para determinar as circunstancias nas que se atopaban e posibles responsabilidades. A Protectora farase cargo da súa tutela cautelar durante a tramitación do expediente.
A intervención xerou expectación entre os residentes da zona, algúns dos cales mostraran a súa preocupación polas condicións da vivenda e o estado dos cans.
