A Vicepresidencia da Deputación de Lugo está a renovar as pistas de squash do Pazo dos Deportes. Operarios da empresa adxudicataria -especializada nestes recintos deportivos – traballan nos últimos días na renovación completa das catro pistas.
A intervención inclúe a instalacións de novos paneis de madeira con polímero de alta resistencia e hidrógufo, adaptado á normativa federativa, e a reparación dos muros laterais con revestimento de morteiro.
O vicepresidente da Deputación Efrén Castro explicou que “desde a posta en funcionamento das pistas fixéronse intervencións puntuais, pero as imperfeccions acumuladas requerían unha renovación integral que se está executando nestes días e que pretende ofrecer as mellores condicións de uso para clubs e deportistas que utilizan as instalacións”.
Nese sentido, Efrén Castro explicou que “se trata dun investimento máis na modernización e actualización do Pazo, unha instalación que, ademais de ser a casa do baloncesto, empregan deportistas doutras modalidades, ofrecendo un servizo fundamental para a actividade deportiva na cidade de Lugo”
A área de Deportes destina 36.000 euros á renovación destes espazos deportivos, que empregan habitualmente deportistas dos clubs lucense Squash Muralla e Monstruíños, ademais doutros deportistas a título particular.
