As declaracións realizadas polo BNG carecen de calquera fundamento e responden, unha vez máis, ao intento de xerar unha polémica artificial arredor dunha actuación plenamente xustificada por razóns de seguridade.
Existe un escrito presentado no concello o 22 de febreiro de 2026 pola empresa concesionaria do transporte escolar no que advertía do mal estado da pista e expresaba a súa preocupación polos riscos existentes para a prestación do servizo, solicitando unha actuación urxente por motivos de seguridade viaria.
Por tanto o motivo da intervención no camiño que vai da N-640 a Pedreda, e o camiño da igrexa en Santa María de Muxa é para dar resposta a unha demanda real e resolver un problema que o anterior Goberno deixou sen atender.
As obras municipais non se executan en función de onde resida ningún concelleiro ou concelleira, senón atendendo ás necesidades da cidadanía e aos informes e peticións que recibe o Concello. De feito, a vivenda da concelleira, Flor Rubinos, atópase a tres quilómetros do lugar onde se levará a cabo esta actuación, polo que a insinuación realizada polo BNG é completamente falsa.
O máis rechamante é que esta forma de actuar non é nova. Os grupos políticos do anterior goberno local volveron intentar sacar rendemento político de problemas que cando gobernaba decidiu ignorar. O exemplo máis recente é o do cruzamento das Gándaras: tras o tráxico accidente rexistrado hai uns días o que foi o seu socio de goberno reclamou publicamente a construción dunha rotonda, cando existía desde febreiro de 2022 unha solicitude formal dos empresarios advertindo desa necesidade a que non deron resposta.
