Comisións Obreiras (CC.OO.) denuncia unha redución “histórica” das contratacións durante o verán en Lugo, o que provoca “sobrecarga de traballo” e un empeoramento da calidade do servizo postal. Segundo os datos recompilados polo sindicato, os maiores recortes producíronse en Lugo, Monforte, Quiroga e Foz, onde a cobertura de vacacións e ausencias está “moi por debaixo das necesidades reais do servizo”. “Correos pretende prestar máis servizos con menos persoas“, resume.
“Cada verán recorta a contratación mentres aumenta a poboación, medra a paquetería e se incorporan novas tarefas ás xa existentes. É unha decisión exclusivamente económica que acaba pagando a plantilla e a cidadanía”, denuncia. CC.OO. reprocha que estes recortes “resultan especialmente contraditorios cando a dirección de Correos continúa presentando publicamente a empresa como un instrumento esencial para a cohesión territorial e anuncia novos servizos públicos que requiren máis recursos humanos e non menos”. Censura que este recorte nas contratacións se produza cando Correos “se gaba” duns beneficios de 11,5 millóns de euros declarados pola entidade en 2025.
