O Concello de Lugo abrirá do 8 ao 12 de xuño o prazo de inscrición para participar nas Aulas Abertas de Verán, un programa destinado a facilitar a conciliación familiar e laboral durante os meses estivais e que este ano contará con 440 prazas para nenos e nenas de entre 4 e 10 anos.
A iniciativa desenvolverase durante os meses de xullo e agosto nos centros de convivencia de Fingoi, Lamas de Prado, Maruja Mallo, Milagrosa e Paco Martín, cunha programación que combinará actividades deportivas, xogos, obradoiros e propostas lúdicas adaptadas ás diferentes idades.
As actividades organizaranse de luns a venres en catro quendas: do 1 ao 15 de xullo, do 16 ao 31 de xullo, do 3 ao 14 de agosto e do 17 ao 31 de agosto, en horario de 8:30 a 14:30 horas. O programa está dirixido a nenos e nenas nados entre os anos 2016 e 2022, que deberán ter cumpridos os 4 anos e non superar os 10 anos na data de inicio da actividade solicitada.
As solicitudes poderán presentarse entre os días 8 e 12 de xuño en horario de 9:00 a 13:00 horas de forma presencial, de xeito telemático ou por rexistro cun modelo de solicitude. No caso das actividades previstas no centro Paco Martín, a inscrición presencial realizarase no centro de convivencia da Milagrosa.
A adxudicación das prazas realizarase mediante sorteo informático público o día 17 de xuño. As listas provisionais publicaranse o 18 de xuño e as definitivas o día 26, unha vez rematado o proceso de formalización das inscricións. Manteranse as bonificacións para as familias, cun desconto do 50% para o segundo fillo ou filla e gratuidade total para o terceiro membro da mesma unidade de convivencia.
O concelleiro de política social, maiores e migración, Gustavo Díaz, explicou que se reforzará durante os meses de xullo e agosto a programación de actividades gratuítas ao aire libre, abertas a toda a veciñanza e sen necesidade de inscrición previa e tamén con actividades puntuais nos distintos centros
A programación de actividades ao aire libre incluirá propostas relacionadas coa actividade física, o benestar e os hábitos saudables, como bioximnasia, pilates, ioga, ximnasia, exercicios de relaxación e respiración ou sesións de activación corporal.
Estas actividades desenvolveranse en diferentes espazos públicos da cidade, entre eles o Parque da Milagrosa, a Praza Viana do Castelo, Fingoi (á beira do río Miño, cerca do ponte de madeira que cruza a nacional), a Praza das Illas, o Parque Rosalía de Castro, a Praza do Centro de Convivencia Lamas de Prado e a Praza do Castiñeiro, en horario de mañá ou tarde.
Dende o Concello destacan que esta programación permite ofrecer alternativas de lecer saudable e ampliar a oferta de actividades para toda a poboación durante os meses de verán así como na primeira semana de setembro con actividades interxeracionales.
