A Garda Civil detivo a un veciño da Fonsagrada como suposto autor dun delito de roubo con forza dunha motocicleta tipo enduro, que estaba estacionada nun garaxe comunitario da cidade de Lugo.
Segundo informou a Comandancia, a investigación iniciouse tras a denuncia presentada polo propietario da moto e a análise das cámaras de seguridade do inmoble permitiu comprobar que o roubo se produciu na madrugada do 6 de febreiro pasado.
As imaxes captadas mostraban como unha persoa accedía ao garaxe a través do portal de edificio e, posteriormente, abría a porta de acceso para introducir unha furgoneta na que cargaba a motocicleta subtraída.
A investigación levou a constatar que a furgoneta pertencía a unha empresa de aluguer e que o ladrón accedera ao recinto sen forzar a porta, polo que a Garda Civil sospeitaba que o autor tiña chaves de acceso ao inmoble
A motocicleta foi localizada o pasado mes de abril pola Garda Civil, estacionada nunha rúa do centro de Meira, e procedeuse á súa recuperación.
Igualmente, púidose identificar á persoa que usaba habitualmente o vehículo e que, ao ser interrogado, declarou que adquirira a moto a un terceiro en Lugo. No entanto, as pescudas revelaron que esta versión era falsa e que o sospeitoso residía con anterioridade no mesmo edificio en cuxo garaxe fora roubada a moto, polo que tiña as chaves.
