A viceportavoz parlamentaria do PSdeG e exalcaldesa de Lugo, Lara Méndez, acusou ao presidente da Xunta, Alfonso Rueda, de avalar o “pacto do tanatorio” –en referencia ao acordo alcanzado por Elena Candia coa edil tránsfuga para a moción de censura– e lembroulle que o fallo do Tribunal Constitucional é previo á aprobación dos últimos estatutos do Partido Popular.
Na rolda de prensa posterior á reunión da Xunta de Portavoces e despois de que na xornada do luns Rueda avogase por modificar a norma interna para que sexa acorde co aval do Tribunal Constitucional (TC) ao voto tránsfuga en mocións de censura, Lara Méndez asegurou que os estatutos do PP foron aprobados en xullo de 2025, cando xa se coñecía a sentenza do TC do mes de xuño sobre a Lei Antitransfuguismo.
Por iso, Méndez criticou a “cara de cemento armado” de Rueda coa moción de censura e sinalou que o tamén presidente do PPdeG incumpre os estatutos do seu propio partido e non lle abre expediente a Candia por apoiarse nunha tránsfuga porque “non lle dá a gana”.
Méndez esixiu a Rueda que “deixe de mentir”, porque a Lei Antitransfuguismo “non cambiou” desde que se aprobaron as normas do PP que, segundo sinalou, obrigan a expedientar aos candidatos ou candidatas que se apoien en tránsfugas.
“Despois de apoiarse nunha tránsfuga, apóianse nunha mentira tras outra”, censurou Lara Méndez, que advertiu que “Lugo nin esquece nin perdoa” pola actuación do PP na cidade.
PROCESO DE ELECCIÓN DE CANDIDATOS
Por outra banda, preguntada polo proceso interno de elección de candidatos, Lara Méndez lembrou que o Partido Socialista celebrará ao seu comité federal o próximo 27 de xuño, a partir do que o PSdeG establecerá a súa folla de ruta.
Isto, segundo indicou, mentres os órganos provinciais xa levan a cabo un “traballo importante” de face á preparación das eleccións municipais.
