Greenpeace publicou un mapa para coñecer as zonas de España nas que a auga está contaminada por nitratos, onde figuran dous puntos negros en Galicia: Trasmiras –na contorna da Limia tamén hai varios outros puntos vermellos polo seu perigo– e A Pobra de San Xiao.
Con motivo do Día Mundial da Saúde, Greenpeace publicou un mapa interactivo onde calquera persoa pode consultar a calidade da auga do seu municipio en canto á concentración de nitratos. Esta ferramenta, que recolle a última información consolidada (referente a 2024) e publicada polo Sistema de Información Nacional de Augas de Consumo (SINAC) do Ministerio de Sanidade, permite visibilizar “a preocupante situación que se vive en España”.
O mapa mostra os 332 municipios españois onde non se puido beber a auga da billa nalgún momento de 2024 debido a que a concentración de nitratos superou o límite legal actual (50 mg/l) e os 2.860 municipios nos que se igualou ou superou nalgún momento de 2024 o valor recomendado pola ciencia (6 mg/l) para protexer eficazmente ás persoas ante as enfermidades que poden ser xeradas debido á exposición aos nitratos, en particular, o cancro colorrectal, o de maior incidencia en España.
En total, o 51,17% dos municipios analizados presenta unha concentración de nitratos na auga superior ao límite recomendado pola ciencia.
“Esta contaminación está provocada esencialmente polo uso masivo de fertilizantes sintéticos na agricultura intensiva e as inxentes deyecciones dos animais explotados pola cruel gandaría intensiva e as súas macrogranjas. A nivel europeo considérase que o 81% da achega do nitróxeno agrícola aos sistemas acuáticos provén directa ou indirectamente da gandaría”, explica nun comunicado.
“A contaminación da auga por nitratos é invisible. Non se ve nin se cheira. Acceder aos datos oficiais é realmente complicado e co mapa que Greenpeace lanzou calquera persoa vai poder saber como está a auga que sae da súa billa e actuar fronte ao problema. Non podemos seguir permitindo que as macrogranjas envenenen a auga de todas as persoas para que os reis da carne estean a forrarse. Exportamos a inmensa maioría da carne de porco e quedámonos cunha auga, literalmente, de merda”, afirmou o responsable de gandaría en Greenpeace, Luís Ferreirim.
