A Xunta de Galicia e o Concello de Castro de Rei analizaron o proxecto para mellorar a calidade da auga do servizo municipal de abastecemento, unha actuación cun investimento previsto de 1,2 millóns destinada a garantir un consumo seguro para a poboación, a hostalaría e as empresas. A conselleira de Medio Ambiente e Cambio Climático, Ángeles Vázquez, e o alcalde, Francisco Balado, mantiveron unha reunión en Santiago de Compostela para abordar esta iniciativa, incluída no proxecto de mellora da estación de tratamento de auga potable (ETAP) que se está redactando.
A actuación será financiada nun 80% pola Xunta e nun 20% polo Concello. Segundo trasladou o rexedor, o proxecto é necesario para resolver os problemas que impiden que parte da poboación e do tecido empresarial poida utilizar a auga da traída municipal.
A conselleira destacou que, con este tipo de investimentos e o apoio técnico e financeiro aos concellos, búscase garantir unha subministración de auga segura e de calidade, reforzando a eficiencia do servizo e o benestar da cidadanía.
