A alcaldesa de Burela, a socialista Carmela López, foi elixida este mércores como nova presidenta da Deputación de Lugo cos votos do PSOE, do BNG e do integrante do grupo mixto, o expresidente da institución José Tomé. A rexedora contou co apoio de todos os deputados socialistas e do Bloque Nacionalista Galego, así como do propio José Tomé, que avanzou ao comezo do pleno que se sumaba á proposta do Grupo Socialista. Na sesión os populares apoiaron ao seu propio candidato, o portavoz do PP na institución provincial, Antonio Ameijide.
Deste xeito, socialistas e nacionalistas dan continuidade ao acordo de goberno que mantiñan na institución provincial ata que a principios do pasado mes de decembro o que era presidente, o aínda alcalde de Monforte José Tomé, renunciou á Presidencia e saíu das filas socialistas tras ser denunciado por suposto acoso sexual a través da canle interna que para iso habilitou o Partido Socialista.
Carmela López logrou manter a unidade no Grupo Provincial Socialista e lograr o respaldo dos tres deputados provinciais que encabezaron unha candidatura alternativa a Tomé nas primarias que o PSOE de Lugo celebrou á Secretaría Xeral. A alcaldesa de Burela prometeu “pola súa conciencia e honra cumprir fielmente” as obrigacións da Presidencia da Deputación de Lugo, con “lealdade” a Rei, á Constitución e ao Estatuto de Autonomía de Galicia.
IGUALDADE NO CENTRO DO DISCURSO
Tras tomar posesión do cargo, no seu primeiro discurso, Carmela López asegurou asumir Presidencia desde a igualdade e manifestou que chega ao cargo grazas ao camiño feito por moitas mulleres e homes para que “cada vez haxa máis mulleres na política”. “A miña experiencia como alcaldesa, o cargo máis fermoso que se pode alcanzar en política, ensinoume a gobernar con capacidade de diálogo, accesibilidade e empatía, pero tamén con firmeza e criterio propio”, destacou.
Todo iso nunha intervención na que puxo en valor o traballo do goberno bipartito na institución e subliñou tamén a súa “estabilidade”. Á oposición dirixiuse directamente para amosar a súa disposición a chegar a acordos “beneficiosos para os veciños da provincia, pondo sempre por diante o interese colectivo”. Defendeu a existencia de debate e de diferentes visións no seo do organismo que agora preside, pero insistiu en que “debe de haber algo por encima de todo, o interese da provincia”. Ademais, agradeceu a confianza mostrada nela polo PSOE, á que asegurou que responderá con “compromiso e servizo público”.
Non faltaron as palabras de recoñecemento á súa familia, onde non puido reprimir a emoción, aos que agradeceu o seu apoio “que foi fundamental para estar aquí”. E fixo tamén un recoñecemento ao traballo levado a cabo polo equipo de Goberno anterior “un traballo serio e útil”, lembrando as palabras do anterior presidente, sobre que a Deputación é “o Concello dos concellos”. Concluíu o seu discurso lembrando que se impulsarán proxectos e “traballarase polo conxunto da provincia de Lugo e polos nosos veciños”.
Ao pleno asistiu tanto o secretario xeral do PSdeG, José Ramón Gómez Besteiro, como a presidenta dos populares de Lugo, Elena Candia. Antes de arrincar o pleno, PSOE e BNG avanzaban a súa intención de apoiar a candidatura que encabeza a alcaldesa de Burela, mentres que o portavoz do PP, Antonio Ameijide, volveu cualificar de “pacto da vergoña” o acordo.
ASÍ FOI A SESIÓN
Tras a apertura da sesión por parte do presidente en funcións da Deputación, o nacionalista Efrén Castro, e a lectura da normativa para a elección, o PP presentou como candidato a Antonio Ameijide, actual portavoz do grupo, mentres que o PSOE postulou a Carmela López, alcaldesa de Burela, tal e como anunciara ao comezo do ano. Ademais, no José Tomé, agora concelleiro non adscrito, sumouse á proposta socialista, mentres que o BNG, que xa trasladara a súa intención de apoiar á candidata do PSOE, comunicou a súa intención de non presentar candidato.
Votaron en primeiro lugar todos os disputados populares –na súa condición de lista máis votada–, mentres que os socialistas e nacionalistas fixérono a continuación, pechando a votación o non adscrito. Tal e como se agardaba e sen sorpresas, Carmela López logrou os 13 votos que necesitaba, sumando PSOE, BNG e ao deputado non adscrito para facerse coa Presidencia da Deputación, cargo ao que accedeu cunha ovación de deputados e público asistente, que se repartiu entre o propio salón de plenos e o de actos anexo. Alí seguiron a sesión a través dunha pantalla diversos cargos do partido, amigos e familiares.
CONTINUIDADE AO ACORDO DE GOBERNO PROVINCIAL
Deste xeito, socialistas e nacionalistas dan continuidade ao acordo de goberno que mantiñan na institución provincial ata que a principios do pasado mes de decembro o que era presidente, o aínda alcalde de Monforte José Tomé, renunciou á Presidencia e saíu das filas socialistas tras ser denunciado por suposto acoso sexual a través da canle interna que para iso habilitou o Partido Socialista. Carmela López logrou manter a unidade no Grupo Provincial Socialista e axuntar o respaldo dos tres deputados provinciais que encabezaron unha candidatura alternativa a Tomé nas primarias que o PSOE de Lugo celebrou á Secretaría Xeral.
TOMÉ FACILITARÁ O LABOR DO GOBERNO BIPARTITO
O secretario xeral do PSdeG, José Ramón Gómez Besteiro, asegurou que a alcaldesa de Burela, Carmela López, será unha “gran lideresa” ao “temón” da Deputación de Lugo, institución na que este mércores tomou posesión como presidenta tras a renuncia o pasado mes de decembro de José Tomé ao ser denunciado por suposto acoso sexual. En declaracións aos medios tras a celebración do pleno no que Carmela López logrou o apoio de PSOE, BNG e do propio Tomé, o xefe de filas do PSdeG describiu esta xornada como un “día de alegría” e asegurou que a nova presidenta marca unha “forma de facer política claramente socialista”, coa súa aposta pola cooperación cos concellos e a integración da provincia fronte a un PP que “maltrata” a Galicia interior.
BESTEIRO FALA DE “AIRE FRESCO”
Besteiro, que destacou que este tipo de política supón un “aire fresco“, rexeitou as acusacións do PP, que cualifica o acordo entre BNG e PSOE como “pacto da vergoña”. “O PP que se deixe de facer declaracións erráticas, descalificatorias, e que se centre nos intereses da provincia”, asegurou. O secretario xeral do PSdeG sostivo que “o PP ano tras ano materializa” na provincia de Lugo a súa falta de investimentos e de aposta polo rural, ao mirar só “para outra parte de Galicia” e nunca para “Lugo e a Galicia interior”.
Ademais, argumentou que os “pactos da vergoña” son as mocións de censura que o PP fai por toda Galicia “nos que se ignoran totalmente os resultados das eleccións e nos que se pactan cuestións inconfesables”. Preguntado respecto diso, Besteiro lembrou que a dirección do PSdeG pediu a José Tomé, quen xa está fóra das siglas socialistas, que entregue a acta, pero lembrou que a acta é persoal. Precisamente, aínda que rexeitou facer declaracións aos medios, Tomé mostrouse este mércores disposto a facilitar o labor de goberno á nova presidenta. “Hoxe é o seu día“, trasladou.
PAULA PRADO LAMENTA A “CONSUMACIÓN DO PACTO BALTROTEIRO”
Pola contra, a secretaria xeral do PPdeG, Paula Prado, lamentou este mércores “a consumación do pacto baltroteiro entre PSOE, BNG e o presunto acosador sexual José Tomé”, cuxo voto, subliñou, foi hoxe “necesario” para que a socialista Carmela López fose elixida como nova presidenta da Deputación de Lugo. “Hoxe só podo dar o pésame aos veciños de Lugo porque este tripartito PSOE, BNG e Tomé acaba de enterrar a defensa dos intereses dos cidadáns”, trasladou, mediante un comunicado, a número dous dos populares galegos.
Prado preguntou a PSOE e BNG “con que cara van defender a partir de hoxe ás mulleres tras formar goberno co voto dun presunto acosador sexual”. Ao tempo, sinalou a Ana Pontón e José Ramón Gómez Besteiro como cómplices deste pacto”. “Que manual de feminismo recomenda formar goberno cun presunto acosador sexual?”, preguntouse. Á nova presidenta da Deputación de Lugo lembroulle que “foi elixida grazas ao apoio deste deputado sobre o que pesan denuncias de mulleres” e cualificou de “desvergoña” que Carmela López falase de igualdade durante o seu discurso. “Ten que saber que ela tamén é cómplice deste pacto baltroteiro”, insistiu Prado.
O PP DE BURELA CRITICA O “MÉTODO TOMÉ” DA NOVA PRESIDENTA
O PP de Burela reaccionou á elección de Carmela López como nova presidenta da Deputación de Lugo. Os populares consideran a López como a “alumna avantaxada” do seu mentor, asegurando que xa aplicou desde a alcaldía de Burela o “método Tomé“, baseado en actitudes que cualifican de déspotas e autócratas, chegando incluso a ocultar información á oposición.
No seu comunicado, o grupo popular lembra que a designación de López como candidata nas municipais de 2023 foi imposta por Tomé nunha reunión polémica, en contra das pretensións do actual tenente de alcaldesa. Así mesmo, temen que o seu novo cargo non beneficie a Burela, censurando a súa “incapacidade” para resolver os problemas locais, as irregularidades administrativas e a falta de orzamentos no municipio, onde aseguran que dedica máis tempo a atacar á oposición que a gobernar.
