A portavoz nacional do BNG, Ana Pontón, defendeu o pacto dos nacionalistas na Deputación de Lugo co PSOE para apoiar a candidatura da alcaldesa de Burela, Carmela López, para presidir a institución provincial tras a dimisión de José Tomé polas denuncias de acoso sexual contra el e reprochou ao PP que “queira aproveitarse” desta situación para facerse coa Presidencia e “queira utilizar ás vítimas de violencia machista”.
A preguntas dos medios este martes nun acto en Santiago, a líder nacionalista tachou de “vergoñosa” a actitude dos populares nesta cuestión e insistiu en que o BNG “sempre” dixo que “unha persoa sobre a que haxa acusacións tan graves non podía seguir”. “O que imos garantir é que haxa un goberno onde esa persoa non ten ningún tipo de responsabilidade”, defendeu antes de pedir explicacións ao presidente da Xunta e líder do PPdeG, Alfonso Rueda, sobre se “pretendía facerse coa Deputación, na que non ten maioría, grazas a unha persoa acusada de agresión sexual”.
Nesta liña, despois de que os populares tachasen como “pacto da vergoña” o acordo entre BNG e PSOE, Pontón asegurou que “o que é vergoñento” é a actitude do PP para “facerse coa presidencia” e que queira, engadiu, “utilizar así ás vítimas de violencia machista”.
