O presidente da Xunta e líder do PP galego, Alfonso Rueda, retou ao BNG este luns a comportarse “con coherencia” e a non facilitar a elección da alcaldesa de Burela, Carmela López, como presidenta da Deputación de Lugo. A votación para cubrir o posto tras a renuncia de José Tomé, que dimitiu tras as denuncias por acoso sexual pero retivo a acta provincial así como a Alcaldía de Monforte, terá lugar nun pleno previsto para o vindeiro mércores.
“Agardo que non se dea o xigantesco exercicio de hipocrisía de pactar o goberno con quen provoca toda esta situación porque se podería dar un tripartito entre o PSOE ou o que queda del, o BNG, e o señor Tomé”, advertiu Rueda, na comparecencia de prensa posterior ao Consello da Xunta. “Veremos se hai coherencia”, continuou, antes de matizar que por parte do PSOE xa non a agarda e apuntar ao BNG.
Así, sinalou que os nacionalistas “denostaron” a Tomé e asegurou que está á agarda de ver se manteñen “a coherencia” ou perden “a lexitimidade” ao facer “o contrario ao que estiveron a dicir estes días”. Por parte do PP, esgrimiu que, se non existise un acordo alternativo, non lle faría falta “pactar con ninguén” para acceder á Presidencia da institución provincial.
