Comisiones Obreras (CC.OO.) denunciou que o BNG “acepta” a existencia de “riscos estruturais, filtracións de auga e condicións indignas” tanto para os nenos e nenas como para os traballadores da Escola Infantil Gregorio Sanz, en Lugo. A central sindical incidiu nunha nota de prensa difundida este mércores, que o Bloque decidiu “substituír a xestión responsable por unha cadea interminable de parches” que “non resolven absolutamente nada”. Ademais, subliñou que esta situación “non é accidental nin inevitable”.
Neste sentido, engadiu que o que ocorre na escola é unha “consecuencia directa dunha mala xestión política”, dunha “absoluta falta de planificación” e dunha “negativa sistemática a investir en solucións definitivas”. “O BNG sabe que os arranxos provisionais non funcionan, pero persiste neles porque prefire aparentar que actuar de verdade”, criticou a entidade. En concreto, CC.OO. sinalou que o centro carece dun sistema de climatización axeituado, o que provoca que durante o verán as aulas se convertan en “fornos” e no inverno a calefacción falle “de maneira reiterada”.
Así mesmo, a entidade denuncia que xa existe un orzamento de 20.000 euros aprobado para adquirir o equipamento de climatización, unha cantidade que o sindicato tacha de “ridícula” para unha administración local. Ante esta situación, para CC.OO o BNG “demostra que non está á altura da responsabilidade que asumiu” e, en consecuencia, esixiu solucións inmediatas e definitivas ás pingueiras e á climatización da Escola Infantil Gregorio Sanz.
